CAPITULU IX.

ET essende alzadu ad sa barca, passesit ad s' atera
parte de su mare et benzesit ad sa cittade sua.
2 Et ecco li presentesint unu paraliticu corcadu in su
lettu. Et bidende Jesus sa fide de ipsos, nesit ad su
paraliticu: Confida, fizu: ti sunt perdonados sos peccados tuos.
3 Et ecco algunos de sos iscribas nesint intra se :
Custu frastimat.
4 Et Jesus bidende sos pensamentos ipsoro, nesit:
Proite pensades male in sos coros bostros?
5 Ite est plus facile narrer: Si ti perdonant sos peccados
tuos, o narrere: Pesa et camina ?
6 A tales qui ischedas, qui su fizu de s' homine tenet
potestade subra sa terra de perdonare sos peccados, tando
narat ad su paraliticu: Pesa, lea su lettu tou, et bae in
domo tua.
7 Et sinde pesesit, et si qu' andesit a domo sua..
8 Bidende custu sas turbas timesint, et glorifichesint
a Deus, qui desit tale potestade ad sos homines.
9 Et essende Jesus partidu dai cuddae, bidesit un' homine
sezzidu in sa banca, de nomen Matteu. Et li narat,
Sighimi. Et adderettendesilu sighesit.
10 Et succedesit qui essende ipse sezzidu a taula in
domo, ecco qui medas publicanos benzende si sezziant a
mesa cum Jesus, et cum sos discipulos suos.
11 Et bidende custu sos Phariseos naraiant ad sos
discipulos suos : Proite su mastru bostru mandigat cum
sos publicanos et cum sos peccadores ?
12 Ma Jesus iscultende narat: Non est necessariu su
meigu ad sos sanos, ma ad sos malaidos.
13 Andende però imparade su qui est: Querzo sa
misericordia, et non su sacrificiu; proite qui non so bennidu
pro jamare sos justos, ma sos peccadores.
​14 Tando si accostesint ad ipsu sos discipulos de
Johanne nende: Proite nois, et i sos Phariseos deinamus
cum frequenzia : sos discipulos tuos però non deinant ?
15 Et lis narat Jesus: Forsis sos cumpagnos de
un' isposu podent pianghere fina ad tantu qui cum ipsos
est s' isposu ? Det benner però sa die quando lis det
esser leadu s'isposu, et tando dent deinare.
16 Niune però attaccat unu tappulu de pannu ruzu
subra de una bestimenta bezza: proite que leat sa
fortalesa sua dai su bestire, et s' ischirrioladura si faghet
pejus.
17 Nen bettant su binu nou in sas buzas bezzas: qua
si non s'istrappant sas buzas, et i su binu iscolat, et i sas
buzas si perdent; ma bettant su binu nou in buzas noas,
et si cunservant ambas duas cosas.
18 Nende ipse custas cosas ad ipsos, ecco unu principe
si acculziesit, et lu adorait, nende : Segnore, como
m' est morta fiza mia: ma beni, pone sa manu tua subra
de ipsa, et hat a vivere.
19 Et alzendesi Jesus lu sighiat, et i sos discipulos suos.
20 Et ecco una femina, qui dai doighi annos patiat
unu fluxu de sambene, li andesit in segus, et tocchesit
s' ala de su bestire sou.
21 Proite naraiat intro de se: si hap' a toccare tantu
su bestire sou, depo esser sana.
22 Ma Jesus boltadu, et miradala, nesit; confida,
fiza, sa fide tua ti hat salvadu. Et dai cuss' hora sa
femina est istada salva.
23 Et essende arrivadu Jesus in domo de su principe,
et hapende bidu sos trumbitteris, et unu fiottu de gente
qui istrepitaat, naraiat,
24 Besside: proite qui sa pisedda non est morta, ma
dormit. Et lu beffaiant.
25 Et da qui que fit bogada sa gente, intresit, et leesit
sa manu sua. Et i sa pisedda si adderectesit.
26 Et bessesit custa fama in tota quanta cussa terra.
27 De pustis passende Jesus, lu sighesint duos cegos
abboghinende, et nende: Tene misericordia de nois, o fizu
de David.
28 Essende però bennidu a domo, sos cegos si accostesint
ad ipsu. Et Jesus lis narat: Creides qui bos
poto fagher custu? Li narant: Emmo, Segnore.
29 Tando tocchesit sos ojos ipsoro, nende : Segundu
sa fìde bostra, siat factu a bois.
30 Et si abberzesint sos ojos ipsoro: et Jesus los
minatesit, nende: Mirade qui niunu l'iscat.
31 Ipsos però bessende, boghesint sa fama de ipsu in
tota cussa terra.
32 Bessidos custos, ecco li presentesint un' homine
mudu, qui fìt indemoniadu.
33 Et bogadu su demoniu, su mudu faeddesit, et i
sas turbas si sunt maravigliadas. nende : Mai s' est bidu
gosi in Israele.
34 Sos Phariseos però naraiant: Per mesu de su
principe de sos demonios, bogat sos demonios.
35 Et Jesus giraiat totu sas cittades, et i sos casteddos,
imparende in sas sinagogas ipsoro, et preighende
s' Evangeliu de su regnu, et curende ogni infìrmidade, et
ogni maladia.
36 Bidende però sas turbas, si est appiedadu de
ipsas: proite fìnt maltractadas, et istaiant comente berveghes,
qui non teniant pastore.
37 Tando narat ad sos discipulos suos: Sa messera
est meda, sos maniales però sunt pagos.
38 Pregade edducas su padronu de sa messera, qui
mandet sos maniales in su messonzu sou.